Shtetet e Bashkuara të Amerikës kanë liruar të burgosurin më të vjetër të burgut të Guantanamos, Saifullah Paracha.
Saifullah Paracha, 75 vjeçari pakistanez, u arrestua dy vjet pas sulmeve të 11 shtatorit 2001 në SHBA dhe u akuzua si simpatizant i Al-Kaedës.
Paracha u dyshua për financimin e grupit xhihadist, por deklaroi se ishte i pafajshëm dhe nuk u akuzua kurrë.
Burgu ushtarak amerikan pranë Kubës dikur strehonte qindra militantë të dyshuar të kapur pas sulmeve.
“Z. Saif Ullah Paracha, një shtetas pakistanez, i cili mbahej në Gjirin e Guantanamos, është liruar dhe ka arritur në Pakistan të shtunën, 29 tetor 2022,” tha ministria e jashtme e Pakistanit.
“Ne jemi të kënaqur që një shtetas pakistanez i ndaluar jashtë vendit më në fund është ribashkuar me familjen e tij”, shtohet në deklaratë.
Clive Stafford-Smith, avokati i zotit Paracha, pyeti pse ishte dashur kaq shumë kohë që klienti i tij të lirohej.
- Paracha u kap në korrik 2003 në Tajlandë pas një operacioni të ashpër nga FBI Amerikane [Byroja Federale e Hetimeve].
Zoti Paracha, i cili studioi në SHBA, u akuzua nga autoritetet amerikane se kishte kontakte me disa nga figurat më të larta të grupit, duke përfshirë udhëheqësin e tij, Osama bin Laden dhe Khalid Sheikh Mohammed.
Pas 14 muajsh në një burg ushtarak amerikan në Bagram, Afganistan, ai u transferua në Guantanamo.
Burgu sekret ushtarak amerikan është përdorur për të mbajtur atë që Amerika i përshkruan si luftëtarë të paligjshëm të kapur gjatë “luftës së saj kundër terrorit”.
Presidenti i SHBA Joe Biden është nën presion për të pastruar të burgosurit e pa akuzuar dhe për të vazhduar me gjyqet e atyre që akuzohen për lidhje të drejtpërdrejta me Al-Kaedën.
Administrata e tij miratoi lirimin e zotit Paracha vitin e kaluar, së bashku me atë të një shtetasi tjetër pakistanez, 55-vjeçarit Abdul Rabbani dhe jemenasit Uthman Abdul al-Rahim Uthman, 41 vjeç.
Deklarata nga ministria e jashtme pakistaneze nuk e përmend Rabbani.
Janë ende 35 persona të mbajtur në Guantanamo, duke përfshirë Khalid Mohammedin, i quajtur si “arkitekti kryesor i sulmeve të 11 shtatorit” në Raportin e Komisionit të 11 shtatorit .
Avokati i zotit Paracha tha se ai pret që të lirohen më shumë të burgosur gjatë muajve të ardhshëm.
“Unë kam ende katër klientë atje [në Guantanamo], të cilët të gjithë janë liruar nga Gjykata”m tha ai për BBC, duke shtuar se zvarritjet ishin një “turp për SHBA”.